حنين

مدونتى الحبيبه ما أحلى الرجوع إليكى

2012-01-10T08:12:00.003+02:00

وحشتنى المدونه ووحشتونى كلكم

اصدقائى أعتزر عن غيابى لكن دايما بياخدنى الحنين

وارجع تانى اقولكم إزيكم وحشتونى

وكل سنه وانتم طيبين وعام جديد

بكره فيه أحلى من النهارده بالتأكيد

اكيد مش بحلم

2011-02-12T01:11:00.006+02:00

دى حقيقه ولا انا بحلم

يعنى اكيد مش بحلم

ما فيش كلام يعبر عن احساسنا كلنا

الحمدلله الحمدلله يارب الخير لبلادنا وولادنا يعيشوا فى امان

يارب اللى جاى احسن وبكره احلى من النهارده مبروك لنا جميعا ويارب زمن جديد عهد جديد خير وحب وامان حريه مافيش خوف من بكره

نغم حياتى

2011-01-13T23:31:00.004+02:00

نورتى حياتى يا نغم حياتى
يارب اشوفك فى احسن حال
بنوتى حبيبتى نغم
******* وحشتنى المدونه ووحشتونى كلكم
جوايا كلام كثير واحاسيس مختلفه
ونفسى اتكلم كثير بس مش لاقيه وقت
بس اكيد ان شاء الله راجعه تانى
انا بس حبيت اطمنكم عليا واطمن عليكم
واقولكم وحشتونى
الى اللقاء......

أنا قلبى معاك

2010-12-24T13:52:00.005+02:00

القلب معاك ثانيه بثانيه لو حتى تروح اخر الدنيا
فرحته معاك اول فرحه واشتاق وحياتك للثانيه
ده انا قلبى معاك
هبعت لك كل دقيقه سلام من ساعه ما اصحى لحد ما انام
وهقضى اليوم من بعد اليوم على فات كام يوم وفاضلك كام
بس اوعى تغيب يا اعز حبيب
*************
انا بهدى الكلمات دى للنونه اللى انا فى انتظارها اليومين دول وكمان بقولها لكم جميعا علشان ان شاء الله هغيب عنكم شويه
علشان استقبل بنوتى الجديده بس ادعولى كلكم ارجع لكم بالسلامه

كل عام وانتم بخير

2010-12-06T21:44:00.004+02:00

=========================================

كل عام وانتم بخير واعاد الله علينا الآعياد بخير وسلام ============================

دعنى أرقص

2010-11-28T15:57:00.007+02:00

دعني أرقص حافية القدمين

في مدخل شريانكـ
أرقص .. أرقص .. أرقص
حافية القدمين في مدخل شرايانكـ
كما رقصت طرباً بباب شرياني
وأغتسل بماء أحزانكـ من أحزاني
أرقص ظلماً أرقص حلماً
أرقص رفضاً يهتز كياني
أرقص استنكاراً
أيها الراقص كيف تنساني
أرقص .. أرقص .. أرقص
فالطير يرقص مذبوحاً من الألمِ
أمد جناحي المكسور
في مساحات صدركـ المغرور
مبتله بالمطر وجسدي بالبرد يستعر
أبحث عن دفء نيرانكـ
أرقص وأغتسل بصفائح دمكـ
أرقص على نغمات حروف
تسقط سهواً من فمكـ
قل لي .. قل لي أيها المجنون
أيها العاصف المدمر المجنون
لمن بعدكـ تنحني اغصاني ؟؟
لمن يتساقط تفاحي ولمن ينضج رُماني ؟؟
من بعدكـ يجمع العسل من ورود بستاني
كُن رجلي
ذلكــ الشرقي الريفيّ الأناني ...

كيف تنساني ؟؟

========================================== ((تلك الكلمات منقوله واعجبتنى كثيرا علشان كده حبيت انكم تستمعوا بها معى ))

==========================================

لن تنسى عبيره

2010-11-09T22:10:00.005+02:00

تمر بكل مكان تشم رائحه لذكرى عاشتها معه وتسأل نفسها هل للاماكن رائحه اماكن بالقلب لن تنساها رغم مرور الزمن عليها رائحه عطره تفوح فى اجواء الاماكن كلما مرت بمكان كانا معا فيه تشم رائحته فهى تطاردها فى كل مكان حتى فى احلامها وهى تتلهف شوقا لرؤيته ولكن حال دون ذلك الايام فى عينها مسلسل درامى سخيف يتكرر كل يوم دون جدوى فى تغير تلك الحلقات الممله ولكنها مازالت تحيا على امل فى عودته لترتوى من عبير عطره فهو وعدها ان لايغيب عنها الا قليلا ولكن القليلا عندها كثيرا فتدعى وتصلى لعل اللقاء يكون عن قريب

فاتت سنه

2010-11-01T19:54:00.007+02:00

زى النهارده كان اول يوم لمدونتى وكتبت اول بوست فى حياتى وانا باعتز به جداااااااوسعدت جدا بدخولى عالم التدوين لانى اتعرفت على شخصيات جميله فعلا واحببتهم بجد وكأننا عائله واحده وبيربطنا شىء واحد انا تشرفت بكم جميعا واشكركم على تعليقاتكم ونصايحكم الجميله وانا حبيت اعيد نشر اول بوست لانه قريب من قلبى جدا

بيت بسيط من بيوت زمان كانت تجلس جدتى الجميله البسيطه كانت تشبه جداتكم فاكرينهم ملامحهم قريبه من بعض وقلوبهم كمان قريبه من بعض فيها نقاء وحب للأخرين عطاء بدون حساب كانوا عايشين حياه هادئه وبسيطه بالهم مرتاح مافيش خوف من بكره ... .مين فينا مايتمناش الزمان يرجع ويعيش يوم واحد من الايام دي انا لسه شايفه جدتى وهى بتنادي عليا تيجى معايا نروح السوق

وتاخدنى ونروح السوق وتنقي وتشترى و تقابل جاراتها وتتكلم مع كل واحده شويه وتطمئن على اخبارهم وصحه أولادهم بكل حب و ود لأن كلهم بيحبو الخيرلبعض وبعد ماخلصت الشوبنج بتاعها لازم تشترى لى حاجه بحبها وكانت هى ..الدوم.. عارفينه طبعا الدوم الناشف ونفضل نقرقض فيه وبعد ماخلصت وروحنا البيت اول حاجه عملتها لى فتحت لى الراديو علشان أتسلى بدل ما أنا قاعده اتفرج عليها وادوشها بالرغى بتاعى وكانت اول حاجه سمعتها فى البيت ده حدوته أبله فضيله وهى كمان كانت بترددها معاها علشان افهمها وكل دة طبعا وهى بتخلص شغل البيت وحان الآن موعد الغسيل وتشوفها وهى بتنشر وكأنها بتعزف على أوتار القانون لحن جميل بمنتهى الدقه والنظام ودلوقتى حان استخدام حاجه مفتقدنها فى أيامنا وهو الباجور ابو شرايط لونه اخضر كانت تجلس امام الباجور لتحمر لى البطاطس لآنى بحبها جدا والبوتاجاز مش فاضى عليه حاجات تانيه وهى عايزه تنجز قبل ما جدو يجى من الشغل وطبعا لأن اليوم فيه بركه مش موجوده هذه الآيام فهى خلصت ولسه اليوم طويل تعمل حاجات تانيه كتير يعنى لو فى حاجه تخيطها وبرضه بنفس الدقه والنظام تتفرج عليها وتتعلم وأخيرا خلصت ياترى هتعملى اه تانى يا ماما ستو يا جميله ؟ عرفت .. عرفت اصلى سى السيد على وصول ودة معناه انها هتلبس احلى حاجه عندها وتستقبله استقبال يليق بسعادته بعد عناء يوم طويل بس انا كنت سعيده جدا معاها وشوفت أحلى أيام فى البيت ده .... يا ترى هنشوف أيام زي الآيام اللى قضيناها في البيت ده جو كله دفا وحنان وطمأنينه وبركه ولا هنكتفى بحكايات نقول فيها . ..كنا زمان..

مسلسل يوسف الصديق

2010-10-06T15:09:00.005+02:00

علماء الأزهر يطالبون بوقف بث المسلسل الايراني يوسف الصديق طالب مجمع البحوث الإسلامية، أعلى هيئة في مؤسسة الأزهر، بوقف بث المسلسل الإيراني "يوسف الصديق"، على قناة "ميلودي دراما" التي تبث على القمر الصناعي المصري "نايل سات"، لتجسيدها للنبي يوسف بما يتعارض مع فتاوى سابقة للمجمع تحظر تجسيد الأنبياء والصحابة وآل البيت. وأكد الشيخ علي عبدالباقي، أمين عام مجمع البحوث الإسلامية، لـ"العربية.نت": "أن المجمع جدد رفضه لظهور الأنبياء فى اجتماعه الشهري أمس الخميس، خاصة ما عرض على المجمع بشأن مسلسل "يوسف الصديق"، وقد رفضنا إذاعة المسلسل ومنعه في أي فضائية مصرية تطبيقاً لقرارات سابقة للمجمع تحظر ظهور الأنبياء في الدراما، وهو موقف ثابت للمجمع لن يتغير". وأعلن مجمع البحوث الإسلامية رفضه القاطع لمسلسل "يوسف الصديق" وأي أعمال أخرى يتم من خلالها تجسيد الأنبياء والصحابة في الأعمال الدرامية، خاصة أن إحدى شركات الإنتاج السينمائي الأمريكية تقدمت بطلب للحصول على موافقة المجمع على إنتاج فيلم تسجيلي عن الجينات الوراثية للرسول (صلى الله عليه وسلم)، إلا أن المجمع رفض هذا الطلب أيضاً، كما رفض الموافقة على مسلسل من إنتاج التلفزيون المصري حول "الحسن والحسين" ابني الإمام علي. "أن فلسفة فتوى تحريم ظهور الأنبياء والصحابة تتمثل في أننا لو فتحنا الباب لتمثيل الرسل والأنبياء فقد نفاجأ بمن يقوم بتمثيل الأنبياء والرسل في فيلم سينمائي أو مسرحية أو مسلسل ثم يقوم بعد ذلك بدور سكير مثلاً أو أي دور يسيء الى الشخص العادي، وبما أن التمثيل محاكاة للأصل، خاصة في الشخصيات التاريخية فإننا نطرح سؤالاً هو: هل كانت هناك تصاوير أو تماثيل تصور أو تجسد أشخاص هؤلاء الرسل في عصورهم حتى نقول إن الشخصية التي مثلت دور الرسول أو النبي تماثل الأصل؟ والإجابة: لا يمكن، لأنه لم يحدث إطلاقًا". ويحكى المسلسل قصة النبي يوسف (عليه السلام) منذ ولادته حتى لقائه بأبيه نبي الله يعقوب (عليه السلام) بعد غياب طويل، ويتكون من 45 حلقة واستغرق تصويره 4 سنوات من عام 2004 - 2008 واشترك في كتابة السيناريو 20 شخصاً. وتقول د. آمنة نصير إن الأزهر أفتى بعدم ظهور الأنبياء والصحابة وقد صدرت هذه الفتوى بعد اجتهاد علماء كبار، وأنا شخصياً أتفق مع الفتوى، ولكن هناك أيضاً بعض المذاهب الفقهية الإسلامية التي تجيز تشخيص الأنبياء سواء ما استمدت سيرتهم من العهد القديم أو العهد الجديد أو ما ذكروا من التراث الإسلامي فهم يجيزون هذا الأمر ونراه على بعض الشاشات العربية والإسلامية. لكن الحقيقه انا لا اخفى عليكم مدى اعجابى بالمسلسل ومتابعتى له مع انى ارفض تجسيد ادوار الانبياء واكيد لايمكن حد فينا هيقبل ويتجرأ ويمثل دور النبى صلى الله عليه وسلم

الحمد لله

2010-09-28T08:35:00.006+03:00

فتاه بسيطه هادئه الطباع فى بدايه عمرها الجميل اول العشرين يعجب بها قريبها ويبوح بما داخله نحوها الى امه حتى تساعده فى ان تخبرهم ولكن عليهم الانتظار لفتره غير معلومه لان ابنه عمه لم ترتبط بعد والجميع يأملون في ان يخطبها لكن زى ما بيقولوا القلب وما يريد وما كانش فيه مانع من الانتظار لانها لسه بتدرس يعنى الوقت مش هيفرق معاها واستمر حبه لها فى صمت الى ان يشاء الله ويقدر خير ويتقدم شاب الى خطبه ابنه عمه فيوافق الجميع و يصبح الشاب فى قمه سعادته لانه الان فقط يستطيع ان يخبر عمه وواللده ليتقدمو بصفه رسميه الى قريبته وعندما جاء يوم انتظرته الفتاه طويلا كان لابد ان يخبرهم واللدها بأمر مهم حدث من فتره قريبه لأبنته وهو انها مرضت بمرض نادر اسمه تصلب الاعصاب المتناثر وان علاجه غالى ولكن هى بتقدر تصرفه على نفقه الدوله وكان لابد من ان يعرف ان المرض جاء فجأه وهو بيأثراحيانا على حركتها وان مجهودها فى بعض الاوقات بيكون قليل والشفاء من عند ربنا وكانت النتيجه غير متوقعه من قريب ومن عائله واحده يربطهم الدم انه يرفض وينسحب بكل هدوء مبررا انه يخاف انه يظلمها فى يوم من الايام وكانت صدمه للبنت ولكن تجاوزت الموقف لانها بجد انسانه مؤمنه وقويه ومن ايام بسيطه بتروح تجدد الاشعه علشان تشوف الاخبار ايه وبتروح لدكتور كبير فى علاج المناعه وكانت المفاجأه انها طبيعيه جدا وانها مش مريضه بالمرض بالظبط ولكن هو تشابه مع نفس المرض وأعراضه وانها من اخف حالات التصلب وانها ممكن تاخد علاج بسيط وتتحسن ....... وهنا بقى سؤالى ايه رأيكم القصه دى حقيقيه وانا عايشاها مع اقرب الناس ليا

تاهت كلماتى

2010-09-13T21:18:00.004+03:00

وحشتونى جدااااااااااا باعتذر عن غيابى عن الرد على كتاباتكم الجميله بس بجد وحشتنى المدونه ووحشتنى تعليقاتكم والرد عليكم يارب تكونو بخير وادعولى اكتب حاجه قريب لان ما انكرش انى حاسه بأن تاهت منى حروفى ومش عارفه ليه عندى حاله غريبه من ضياع الكلمات مع انى فى حاجات كثير جوايا نفسى اكتبها لكن قلمى مش عايز يكتب اتمنى ان الحاله دى ماتطولش وده سبب غيابى عنكم لكن قررت انى اقطع فتره الهذيان بأى كلام حتى لو اعتراف منى بضياع قلمى ادعو لى ان أعود بسرعه

اروع بانتومايم

2010-07-27T14:25:00.000+03:00

سامحينى حبيبتى

2010-07-09T18:14:00.002+03:00

مازالت تنتظر حبيبه امام البحر عوده حبيبها وهى حزينه ولا تعرف سبب لتخليه عنها وفى يديها رسالته التى تركها ورحل معبرا فيها عن اسفه سامحينى حبيبتى سأرحل أيقنت اننى لن أستطيع ان أوفر لكى حياه كريمه انتى واولادى بعد ان تركت عملى مجبرا لرفضى لقبول الظلم وسأسعى فى وجود فرصه عمل بالخارج هذا قرار اخذته بعد ان يأست واغلقت امامى الابواب سامحينى حبيبتى ما كنت استطع ان انظر الى عينيك واودعك لذا اخترت ان ارحل بدون وداع انتظرينى وتنتظر حبيبه وهى حزينه لماذا لم تصارحنى وتنظر امامها لترى اطفالها يجرون اليها مسرعين امى انظرى من معنا ابانا قد عاد فيجرى عليها وينظر لها بحزن وندم واسف سامحينى حبيبتى ها انا قد عدت لم استطيع ان اتحمل غيابكم عنى سابحث هنا عن عمل ولن اتركك ثانيه يكفينى ان ارى ابنائى تكبر اما عينى لن اسافر وسأبحث عن عمل فى بلدى ولو بأقل القليل يكفينى ان انظر فى عينيكى اجد راحتى فأنتى حبى ولن نفترق ثانيه سامحينى

لما وعدتنى

2010-06-15T10:59:00.003+03:00

تجرى عليه كالطفله تحتضنه ترتمى فى اعماقه وتغوص بكل مشاعرها تحكى له اسرار عام فات بكل شوق وحنين وتقول وحشتنى يا بحر وفى اخر يوم بالأجازه تودعه وتقول يارب تحقق لى اللى بحلم به وتمر السنين وتعيد نفس الامنيه ولكن بلا جدوى لم يأتى معها الحبيب ومره اخرى تمر السنين واليوم تأتى حبيبه وتجرى كالطفله يا بحر انظر من معى انه الحبيب اتى بعد انتظار اتى يا بحر كم تحدثت معك عنه كم بكيت شوقا له كم تمنيت ان يكون شريكى للأبد ويوعدها الحبيب لن أغيب عن عيناكى حبيبتى ما حييت انظرى حبيبتى للشمس وقت الغروب لحظه تمنيتها كثيرا نراها معا ويدى بيديك لن نفترق ابدا انا وانتى و السعاده تغمر الحبيبين وهاهى ثمره حبهما تأتى الدنيا لتشرق لهما الشمس من جديد صغيرين يملاءا البيت حبا .......واليوم تأتى حبيبه للبحر ولكن وحيده بالصغيرين تبكى للبحر شهدت عليه يا بحر وعدنى لن اكون وحيده وتركنى وحدى ولا أدرى متى سيأتى وكل يوم انتظره وانظر للغروب ولكن لوحدى انا حزينه....

انتظروا باقى الحكايه

عصى الدمع

2010-05-07T16:59:00.004+03:00

اراك عصى الدمع
شيمتك الصبر
اما للهوى
نهى عليك
ولا امر
نعم انا مشتاق
وعندى لوعه
ولكن مثلى
لا يداع
له سر’

بحلم

2010-03-19T18:35:00.008+02:00

بحلم يكون الكون سعيد
وكل يوم يكون فى عيد
مافيش خصام
مافيش فراق
وبلاش ندارى جوانا
حاجات كثير وعيشناها
يا حلم امتى هتتحقق
امتى نعيشك ونصدق
هيحصل ايه
لوالحبيب قال للحبيب
ماليش غيرك فى الكون حبيب
هيكون الكون اكيد سعيد

طلع البدر علينا

2010-02-26T13:37:00.002+02:00

طلع البدر علينا

الكنز المفقود

2010-02-16T01:18:00.000+02:00

الصبر على الابتلاء

أغلى من حياتى

2010-02-09T14:05:00.009+02:00

اليك يا أغلى من حياتى
وعدتنى بأن تحبنى
حتى أخر العمر
ووعدتك بأن تكون
أغلى من حياتى
فاليك كلماتى ***
ْاليك أعزف أحلى ألحانى
أرى فيك كل المعانى الجميله
اليك أرسم أحلى لوحاتى
أرى فيك كل اللمسات الجميله
وستبقى دائما يا حبيبى
أغلى من حياتى

أحبك زوجتى

2010-01-22T17:51:00.008+02:00

جلس مفكرا بأحلى ايام قضاها معها وكيف كانت جميله ورشيقه يتذكر كلامها العذب الجميل الذى سحره من اول نظره وفجأه يستيقظ من احلام يقظته على زعيق وصريخ هاهى حبيبته التى تحولت الى غوله متوحشه اهتمامها الاول والاخير العيال و المطبخ ولم يأتى بباله يوم انه سيكون وحيدا شارد الفكر ولم يكن امامه سوى اوقات يقضيها فى شرفه حجرته متأملا فى الطبيعه وفى ذات يوم وهو جالسا وحيدا كعادته يرى فتاه جميله فى عماره امام عمارته مره بعد مره يجد نفسه مشغول بها وينتظر وقوفها بشرفتها حتى اخذ قراره ضاربا بزوجته واولاده عرض الحائط ...سأذهب اليها لابد ان اتكلم معها سأتزوجها.... لقد سأمت هذه المتوحشه التى اعيش معها وبالفعل يذهب الى بواب العماره ليسأل عنها فضحك البواب فسأله مستغربا وما سبب الضحك قال له اتقصد السيده الجميله التى تسكن بالدور الثالث فقال نعم لما الدهشه اذن فقال له انك خامس واحد تسأل عليها من يوم ما سكنت من فتره قصيره دى سيده منفصله من زوجها لانها ترفض الانجاب وبتحب الخروج والفسح والحريه واهتمامها الاول والاخير نفسها وبس .. صمت الرجل وذهب مسرعا الى زوجته يعترف لها بحبه وتقديره لها فابتسمت الزوجه واعلنت عن حزنها بسبب اهماله لها وجلوسه وحده دائما فجددا وعودهم بأن لا يفترقا ابدا وأغلق شرفته قائلا احبك زوجتى .

ليله احترق فيها قلب

2010-01-04T22:58:00.009+02:00

لم تكن هى اللحظه الوحيده التى احترق فيها قلبها عندما رحل حبيبها الى السماء بعد قصه حب جمعت بينهم وابناء واحفاد عاشا فى قصر كبير جلست لتتذكر يوم جاء ليتقدم اليها والخوف يملأ قلبه من عدم قبول اهلها حيث كان فقيرا ولكن تتمسك به ليصبح زوجها وشريك عمرها تقف بجانبه وتسانده ليتغير به الحال ويصبح من كبار رجال الاعمال وبقدر ما اعطاه الله من مال كان ينفق على كل محتاج وهاهو الان على فراش الموت ويقسم لها بانه لم يحب غيرها وانها اول واخر زوجه له وانه سيسبقها الى الجنه لم تكن تستطيع ان تسمع تلك العبارات فهى احبته حب شديدا ولكن قضى الله امرا كان مفعولا.... لم يتبقى لها سوى زكريات تقضى معها اوقات هذه صوره زفافهم وهذه صوره مع اولادهم واخرى وماذا.... ماهذا ماهذه الورقه ربى انها قسيمه زواج صرخت صرخه رجت بها جدار القصر فجاءها الابناء مسرعون امى ما بكى وكانت هى المره الثانيه التى احترق قلبها فعلا وبعد ان جاءها الطبيب لاعطاءها مهدأات فاجئت ابنائها بطلب لم يصدقوة طلبت ان يذهبوا بها الى زوجته الثانيه لان لها ميراث شرعى فاحتج اولادها وكيف تطلبى منا ان نفعل فقالت اتخالفون ما شرع الله وتوقعت انها ستجد فتاه صغيره تزوجها حبيبها ليعيد بها شبابه ولكن وجدت مالم تتوقعه انها سيده بسيطه يبدوا عليها علامات العناء والشقاء رغم انها تسكن فى بيت فاخر فعرفتها السيده وحاولت ان تتهرب منها فقالت لها لاتخفى نفسك ان لكى ورث واتيت لاعطيه لكى فقالت السيده ولكن هذا ليس الشرع لقد طلقنى زوجك من اسبوع عندما اشتد عليه المرض فهو لايريد ان يتوفى وهو زوج لغيرك فصرخت الزوجه ..ولما اذن تزوجك وانهارت فى البكاء جلست السيده تحت قدمها واقسمت لها بانه كان زوجها على الورق وانه لم يحب غيرك ولم يكن فى حياته غيرك وانما انا سيده ارمله وكان يتردد على ليحسن لى ولابنائى وعندما اتهمنى جيرانى واساؤ الظن فطلب ان يتزوجنى بعد ان عرف اننى لم اكون لاحد غير زوجى المتوفى فقال لى وانا لن تكون فى حياتى غير زوجتى وحبيبه عمرى فبكت الزوجه وقالت لااعرف احزن على فراق حبيبى ام على مافعل حبيبى...

كل دقه فى قلبى

2009-12-28T16:48:00.010+02:00

كل نسمه تمر من عندك عليا*************قلبى يحضنها بشوقه وبحنانه ************** كل كلمه اسمعها عنك تحلى ليا *************** يالى جنبك قلبى بيلاقى امان _______________________ _______________________

أوراقى القديمه

2009-12-07T08:19:00.010+02:00

أوراق قديمه ولكن لها ذكرى لا تنسى لها معنى فى حياتنا من ليس له ماضى فهو بلا حاضر وماضينا يحمل العديد والعديد من الذكريات الجميله التى لاتنسى ها....رجعتو بالزمن معايا شويه وما حدش يقولى قول للزمان ارجع يازمان زى ما بنحلم بحاجات مش بتتحقق وبنقول ده مجرد حلم .هنقول ده مجرد حنين لذكرى قديمه يلا استعدوا معايا..... فى المدرسه مين فينا ماكنش بيكتب لاصدقاءه جمله فى ورقه بتعبر عن صداقتهم واخلاصهم او كلمه من مدرسه او مدرس فى اوتوجراف كلمات جميله فى أوراق قديمه فى أصدقاء كتبوا ووفوا بما كتبوا وما زالوا مستمرين بصداقتهم ولكن فيه أصدقاء لم يبقى منهم الا سطور فى اوراق يعنى ظروفهم جت كده اللى اتنقل واللى سافر لما بنفتح اوراقنا ماننكرش اننا بنفتكرلهم كل خير ونفتكر ايام حلوة بنشتاق لها انها ترجع تانى وطبعا لان كل ماهو قديم افضل من ماهو جديد فالاوراق بنحتفظ بها لكن فى عصر التكنولوجيا ورسائل الموبايلات الكلمات كثير وحلوه لكن الرساله الواحده بتتبعت لأربعين شخص خصوصا لو كانت فى عرض رسائل مجانى يعنى مش لشخصى وكمان لو الذاكره امتلئت بنمسح شويه وده الفرق ان ماضينا جميل بكل المعانى وان الآوراق

هتفضل موجوده للذكرى

شكرا لمدونه رحايا العمر

الفكره دى كانت بعد قراءه

اخر بوست. شوفوه أكيد هيعجبكم

فارس الآحلام

2009-12-03T22:21:00.005+02:00

ما زلت أذكره وأذكر حديثه العذب الجميل

كلمات من أعماق قلبه أسرتنى بحبه

ما زلت أشم عبيره وهو يمر من أمامى

لم يتغير فيه شىء

والآن أشعر بدقات قلبى تزداد

كلما اقترب الميعاد ماأجمل هذا اللقاء

انه اليوم الذى حلمت به كثيرا

انه اليوم الذى انتظرته طويلا

انه يوم الزفاف

وكانت أجمل أيام ولكن

....

تمر الآيام والسنين

ومالى أشعر بالغربه مالى أشعر بالوحده

من هذا الشخص هل هو من احببته

وما هذه القسوه التى اراها فى عينيه

ومالى لا اشم عبيره الذى اعتدت عليه

ماذا حدث لنا ماذا فعلت بك الايام

اننى لم اجده ولكننى سأبحث عنه

ولن أيأس لعلنى أجدك حبيبى

وتعود لى كما كنت فارس الآحلام

كل عام وأنتم بخير

2009-11-27T23:56:00.002+02:00

دى اغنيه بمناسبه العيد يارب تعجبكم كلماتها حلوه وبسيطه

إغتيال البراءه

2009-11-14T13:24:00.006+02:00

وابكى يا عينى على ماله أم

تفهم وتحكى شكوته وتضم

وأبكى وزيدينى يا عين على ماله أب

ازاى هيعرف حتى معنى الحب

***********************

طفل صغيربريء لم يرتكب اى ذنب حتى يكون بيته الصغير هو الشارع.تحت الكبرى.تحت سياره.....

أه السبب ؟

الآسباب كثيره يمكن وفاه أحد الوالدين ومن ثم زواج احدهم ومن ثم قسوه فطرد فتشرد

أوخطف أطفال والتجاره بأعضائهم أو تسريحهم فى الشارع لصالحهم

أو أن يكون هؤلاء الآطفال جاؤا عن طريق غير مشروع

ولكن مهما تعددت الآسباب فالنتيجه واحده وهى

ضياع الطفوله واغتيال البراءه

لم يرتكبوا ذنب ليكون مصيرهم الشارع وما أدراك ماالشارع وما يحدث فيه...

ياريت نقدر نساعدهم وحد يحتويهم بدون مقابل

نظره الى هؤلاء الصغارحتى تدوم البراءه.

كنا زمان

2009-10-30T19:57:00.031+02:00

بيت بسيط من بيوت زمان كانت تجلس جدتى الجميله البسيطه

كانت تشبه جداتكم فاكرينهم ملامحهم قريبه من بعض وقلوبهم كمان قريبه من بعض فيها نقاء وحب للأخرين

عطاء بدون حساب كانوا عايشين حياه هادئه وبسيطه

بالهم مرتاح مافيش خوف من بكره ...

.مين فينا مايتمناش الزمان يرجع ويعيش يوم واحد من الايام دي

انا لسه شايفه جدتى وهى بتنادي عليا تيجى معايا نروح السوق

وتاخدنى ونروح السوق وتنقي وتشترى و تقابل جاراتها

وتتكلم مع كل واحده شويه وتطمئن على اخبارهم وصحه أولادهم

بكل حب و ود لأن كلهم بيحبو الخيرلبعض

وبعد ماخلصت الشوبنج بتاعها لازم تشترى لى حاجه بحبها

وكانت هى ..الدوم..

عارفينه طبعا الدوم الناشف ونفضل نقرقض فيه وبعد ماخلصت وروحنا البيت

اول حاجه عملتها لى فتحت لى الراديو علشان أتسلى

بدل ما أنا قاعده اتفرج عليها وادوشها بالرغى بتاعى

وكانت اول حاجه سمعتها فى البيت ده

حدوته أبله فضيله

وهى كمان كانت بترددها معاها علشان افهمها

وكل دة طبعا وهى بتخلص شغل البيت

وحان الآن موعد الغسيل وتشوفها وهى بتنشر

وكأنها بتعزف على أوتار القانون لحن جميل بمنتهى الدقه والنظام

ودلوقتى حان استخدام حاجه مفتقدنها فى أيامنا

وهو الباجور ابو شرايط لونه اخضر

كانت تجلس امام الباجور لتحمر لى البطاطس

لآنى بحبها جدا والبوتاجاز مش فاضى عليه حاجات تانيه

وهى عايزه تنجز قبل ما جدو يجى من الشغل

وطبعا لأن اليوم فيه بركه مش موجوده هذه الآيام

فهى خلصت ولسه اليوم طويل تعمل حاجات تانيه كتير

يعنى لو فى حاجه تخيطها وبرضه بنفس الدقه والنظام تتفرج عليها وتتعلم وأخيرا خلصت

ياترى هتعملى اه تانى يا ماما ستو يا جميله ؟

عرفت .. عرفت اصلى سى السيد على وصول ودة معناه انها هتلبس احلى حاجه عندها

وتستقبله استقبال يليق بسعادته بعد عناء يوم طويل بس انا كنت سعيده جدا معاها وشوفت أحلى أيام فى البيت ده ....

يا ترى هنشوف أيام زي الآيام اللى قضيناها في البيت ده جو كله دفا وحنان وطمأنينه وبركه ولا هنكتفى بحكايات نقول فيها .

..كنا زمان..